Сүйінші, ауданымызда тұңғыш рет жарнама агенттігі ашылды. Бүгінгі заман талабын ескерсек, жарнама агенттігінің қажеттілігі зор. Алдағы уақытта арнайы билбордтар мен баннерлер үшін алып шаһарға қатынаудың қажеті жоқ. Өзіміздің ауданымызда сапалы әрі креативті жұмыс жасайтын жарнама агенттігі жұмысын бастады. Агенттіктің ашылу салтанатына жаңалық жаршысы ретінде біз де барып қайттық
Жарнама агенттігінің атауы — “INSER GROUP”. Жарнама агенттігінің негізін салушы ерлі-зайыптылар осыған дейін де аудан халқының маңызды қажеттіліктерін өтеп, “Әлижан” әмбебап заттар дүкені арқылы кәсіптерін дөңгелетіп отырған. Жарнама агенттігінің “INSER GROUP” аталуының өз мағынасы бар. INSER сөзі кәсіпкер жұбайлардың есімдерінің алғашқы буындарына негізделген. Агенттіктің логотипінің өзі Инь-Янь белгісіне ұқсайды, ал аталмыш белгі бірін-бірі толықтыру деген мағынаға ие. Отбасылық кәсіп үшін, креативті атау мен логотип үйлесе кетсе керек. Серікжан мырза мен Іңкәр ханым негізінен белгілі маман иелері, отағасы ұлағатты ұстаз болса, жары Іңкәр ханым медицина қызметкері. Адам баласының шексіз мүмкіндігінің нәтижесінде, бақтарын кәсіпкерлікте сынап көрмекке оқталып, қарапайымнан бастаған қос кәсіпкердің еткен еңбектері мен төккен терлеріне аудан тұрғындары куә. Іңкәр ханым кәсіпті, 2018 жылы үйдің бір бөлмесінде ғана бастаған, осылайша, ісі ілгерілеп, 2019 жылы “Әлижан” фотосалон-дүкені болып ашылды. Содан бері араға алты жыл салып, үлкен жарнама агенттігі ашылып отыр.
Жарнама агенттігінің ашылу салтанатына бірқатар маңызды қонақтар қатысып, жаңа ғимараттың лентасын қию мәртебесі аудан әкімінің орынбасары Жанарбек Жантөреұлына, Сарыбастау ауылының имамы Исабол Манап және Серікжан мырзаның әкесі, әулеттің ақсақалы Ерлан мырзаға бұйырды. Ақ жаулықты әжелер шашу шашып, ақжарма тілектерін білдірді. Ашылу салтанатын жоғары дәрежеде тізгіндеген Байжұма Медет мырза шараның көркін кіргізіп, әдеттегідей, қонақтардың көңілінен шықты.
Жоғарыда айтқанымыздай, бүгінгі таңда “INSER group” ауданымыздағы арнайы жабдықталған алғашқы және жалғыз жарнама агенттігі. Агенттікте фото-көрнекіліктер, сканерлеу, көшірме жасау, баннер, стенд жасау, билбордтар жасау сынды аса қажет қызмет түрлерін ұсынады. Арнайы ғимарат та заманауи жабдықталып, келушілерге ыңғайлы жағдай да жасалған.
Жас кәсіпкерлердің тың идеялары мен тынымсыз еңбек көріністері көпке үлгі. Жарнама агенттігі қызметінің аудан тұрғындарының кез келгеніне қажет болатыны сөзсіз. Дөңгелеткен кәсіптері аудан игілігіне қызмет етіп жатқан жандардың кәсіпті бастаудағы ниеттері қуантты. Іңкәр ханымның айтуынша, ерлі-зайыптылардың кәсіп бастаудағы басты ниеті — ақша табудан бұрын, ауданды көркейту, аудан тұрғындарының қажеттілігін өтеу. Жетістікке жетудің басты кілті — ниеттің түзулігінде екеніне тағы бір мәрте көз жеткіздік. Мұнда ерлі-зайыптылар арасындағы өзара түсіністік пен қолдаудың маңызы зор екенін ескерсек, кәсіптің алға жылжуының бір сыры, жастардың бірін-бірі қолдап, өзара үндестікте әрекет етуі.
Бүгінгі күні, еңбек етіп, табыс табуды, үздіксіз дамуды қалаған адамға мүмкіндік шексіз. Тіптен, қазіргі заманда “не істерімді білмеймін” деп, қол қусырып отыру ақылға сыймайды. Талаптан да, ниетіңді түзе, сол ниет негізінде әрекет ет те, берекетін көре бер.
Ақерке БИЖАН