Жол қозғалысы қауіпсіздігін сақтау жүргізушілермен қатар жаяу жүргіншілердің де ортақ міндеті болып табылады. Қазақстан Республикасының Жол жүрісі қағидаларына сәйкес, жаяу жүргіншілер жолдың жүріс бөлігін тек арнайы белгіленген жерлерден — жерүсті, жерасты немесе «зебра» сызығы мен тиісті жол белгілері бар реттелетін және реттелмейтін жаяу жүргіншілер өткелдерінен ғана кесіп өтуі тиіс. Егер жақын маңда өткел немесе қиылыс болмаса, жолды екі жағы да жақсы көрінетін, бөлу жолағы мен қоршауы жоқ учаскеде көлік қозғалысына тік бұрыш жасап (көлденең) өтуге рұқсат етіледі.