Қоғамның дамуы – әр буынның тәжірибесі мен жаңа көзқарасының өзара сабақтасуынан қалыптасатын күрделі үдеріс. Өмірлік тәжірибесі мол аға буынның байыпты пайымы мен жастардың жаңашыл ойы бір арнада тоғысқанда, қоғамдық диалогтың ауқымы да кеңейе түседі. Осы тұрғыдан алғанда, Қазақстан Халық Кеңесінің құрамы жариялануы – қоғамның түрлі салалары мен өкілдерін ортақ алаңға жинаған маңызды қадам.

2026 жылғы 22 қыркүйекте Мемлекет басшысының Жарлығымен Қазақстан Халық Кеңесінің 126 мүшесі бекітілді. Конституциялық заңға сәйкес Кеңес құрамы этномәдени бірлестіктерден – 42, қоғамдық бірлестіктер мен коммерциялық емес ұйымдардан – 42, ал мәслихаттар мен қоғамдық кеңестерден 42 азаматтан қалыптастырылады.

Кеңес құрамына әртүрлі сала өкілдерінің енуі оның қоғамдық диалогтағы ауқымын аңғартады. Тізімде мәслихат депутаттары, қоғамдық кеңес мүшелері, кәсіпкерлер, білім мен ғылым, медицина, спорт, медиа, этномәдени бірлестіктер және басқа да қоғамдық орта өкілдері бар.

Бұл жерде кәсібилік ұғымының мәні ерекше. Қоғамдық мәселелерді талқылау үшін тек пікір білдіру аздық етеді. Белгілі бір саланың ішкі мәселесін, халықтың сұранысын, өңірдің ерекшелігін жақсы білетін мамандардың тәжірибесі қажет. Әр саланың өз өкілі болған жағдайда, ортақ мәселеге әр қырынан қарауға мүмкіндік туады.

Ал жас буынның қоғамдағы белсенділігі бұл үдеріске жаңа серпін береді. Жастардың цифрлық технологияны меңгеруі, жаңа идеяларға ашықтығы, заманауи еңбек нарығы мен қоғамдық өзгерістерге бейімділігі бүгінгі күннің өзекті мәселелерін талқылауда маңызды. Сондықтан тәжірибе мен жаңашылдықтың қатар жүруі қоғамдық диалогтың мазмұнын байыта алады.

Меніңше, буындар сабақтастығы дегеніміз – үлкендердің айтқанын жастардың қайталауы емес, керісінше, әр буынның өз мүмкіндігі мен тәжірибесін ортақ мақсатқа жұмылдыра білуі. Аға буын өткен жолдан жинақталған тәжірибені ұсынса, жас буын сол тәжірибеге жаңа көзқарас пен тың ұсыныс қоса алады.

Қазақстан Халық Кеңесінің құрылымы да осы алуандықты ескеруге бағытталған. Заңда Кеңес мүшелерінің өкілеттік мерзімі төрт жыл деп белгіленген. Оның негізгі мақсаты – халықтың мүддесін білдіру және мемлекеттік саясатты қалыптастыру мен іске асыруға консультативтік тұрғыда қатысу.

Қоғамдық келісім тек бір пікірдің үстем болуымен емес, әртүрлі пікірді тыңдап, ортақ ұстаным қалыптастыра білумен орнығады. Сондықтан Кеңес құрамындағы әр азаматтың кәсіби тәжірибесі, қоғамдық белсенділігі мен өмірлік ұстанымы ортақ талқылауларға өзіндік үлес қоса алады.

Бүгінгі қоғамға тәжірибені бағалайтын, сонымен бірге жаңашылдыққа жол ашатын орта қажет. Осы тұрғыдан алғанда, Қазақстан Халық Кеңесінің құрамында түрлі сала мен түрлі буын өкілдерінің қатар көрініс табуы – қоғамдық диалогтың көпқырлылығын көрсетеді.

Елдің ертеңін қалыптастыруда аға буынның сарабдал тәжірибесі мен жас ұрпақтың тың ойы бір-біріне қарсы қойылмай, керісінше, өзара толықтырылғаны маңызды. Өйткені қоғамның орнықты дамуы – өткеннің өнегесін сақтай отырып, болашаққа батыл қадам жасай білуден басталады.

Айгүл ТАҒАЕВА