Алматы облысында 432 мыңнан астам жас тұрады. Бұл өңір халқының шамамен 30 пайызын құрайды. Халықаралық жастар күніне орай облыстың 9 ауданы мен 2 қаласында 30-дан астам ауқымды іс-шара ұйымдастырылады.«Жастар – өңірдің әлеуметтік-экономикалық дамуының маңызды қозғаушы күші. Сондықтан олардың бастамаларын қолдап, зияткерлік және шығармашылық әлеуетін дамытуға ерекше мән береміз. Биылғы онкүндік аясында 20 мыңнан астам жасты қамту жоспарланып отыр», – деді Алматы облысы жастар саясаты мәселелері жөніндегі басқармасының басшысы Мәди Ахметов.Оның айтуынша, іс-шаралар «Таза Қазақстан», «Заң мен тәртіп», «Оқитын ұлт», «Адал азамат» қағидаттарына негізделеді. Бағдарламада пікірсайыс пен интеллектуалдық ойындар, форумдар мен фестивальдер, экологиялық және қайырымдылық акциялары, спорттық турнирлер қарастырылған.Онкүндік 10 тамыз – Абай күнінен басталып, 12 тамыз – Халықаралық жастар күніне орай жалғасады. Сондай-ақ «Digital Pro», «Volunteer Fest», «Jas Qadam» және «Umtylys» сияқты жобалар аясында бірқатар шара өткізіледі.