Сайлау күнтізбесінде қандай мерзімдер белгіленген?

Қазақстан Республикасы Құрылтайының депутаттарын сайлау науқаны бірнеше кезеңнен тұрады. 2026 жылғы 23 тамызда өтетін сайлауға байланысты Орталық сайлау комиссиясы негізгі іс-шаралардың күнтізбелік жоспарын бекітті. Қазір сайлау науқанының үгіт кезеңі жүріп жатыр, ал дауыс беру күніне санаулы уақыт қалды. 

Сайлаудың негізгі күні – 23 тамыз. Бұл күні еліміздің аумағында Құрылтай депутаттарын сайлау бойынша дауыс беру өтеді. Ал оған дейінгі күндер сайлау процесінің әртүрлі рәсімдеріне бөлінген.

Партиялық тізімдерді ұсыну 13 шілде күні сағат 18:00-де аяқталды. Осы кезеңнің қорытындысы бойынша Орталық сайлау комиссиясына жеті саяси партия өз кандидаттарының тізімдерін ұсынды. Ал партиялық тізімдерді тіркеу кезеңі 23 шілдеге дейін жалғасты. 

Тіркеу аяқталғаннан кейін сайлаудың ресми статистикасы қалыптасты. ОСК мәліметінше, Құрылтайдағы 145 депутаттық мандатқа жеті партиядан 545 кандидат тіркелді. Ең көп кандидат «Әділет» партиясында – 186 адам. «Respublica» партиясы 75, Қазақстан халық партиясы 72, «Ауыл» партиясы 69, «Ақ жол» партиясы 63, «Байтақ» 47, ЖСДП 33 кандидат ұсынды. 

Сайлауалды үгіт кезеңі 23 шілде күні кешкі уақытта басталып, 21 тамызға дейін жалғасады. Одан кейін 22 тамыз – тыныштық күні. Бұл күні сайлауалды үгіт жүргізуге жол берілмейді. Ал 23 тамызда сайлаушылар дауыс беруге қатысады. 

Сайлаушылар үшін тағы бір маңызды мерзім – 7 тамыздан бастап өз деректерін нақты сайлау учаскесіндегі тізімнен тексеру мүмкіндігінің берілуі. Бұл ақпарат тиісті әкімдіктердің интернет-ресурстары немесе байланыс орталықтары арқылы қолжетімді. 

Құрылтай депутаттары бес жыл мерзімге сайланады. Сайлау партиялық тізімдер бойынша біртұтас жалпыұлттық сайлау округінде өтеді. Құрылтай құрамында 145 депутат болады. 

Осылайша, сайлау науқанының соңғы кезеңінде азаматтар үшін негізгі практикалық мәселелер – өзінің сайлаушылар тізіміндегі деректерін тексеру, дауыс беретін учаскесінің мекенжайын анықтау және дауыс беру тәртібімен алдын ала танысу. Ал сайлаудың қорытындысы 23 тамыздағы дауыс беру нәтижелерінен кейін белгілі болады.