2024 жылғы Олимпиада ойындары басталғалы бері спортшыларымыз үшін баршамыздың көңіліміз алаң. Әсіресе Париж төрінде ел намысын қорғап, бақ сынап жүрген жерлестеріміздің жеңісін асыға күтудеміз. Жерлесіміз, өр рухты Назым Қызайбайды осыдан бірнеше күн бұрын олимпиаданың ширек финалына шықты деп бір қуанған едік, енді міне, қола жүлдемен абыройымызды асқақтатты. Алтыннан үмітті едік, дегенмен, бұйырғаны қола жүлде болды.
Назым Қызайбай 1993 жылы қыркүйек айының 14 жұлдызында дүниеге келген. Баршамызға белгілі былғары қолғапты серік еткен жерлесіміз, 2014 жылы Оңтүстік Кореяда болған турнирде алтын жүлдені қанжығасына байлап, әлем чемпионы атағын жеңіп алды. Юниор чемпионатында қола жүлдемен қуантса, Қытайдағы турнирде 3 орынды иеленді. 2016 жылғы Астанада өткен әлемдік турнирде алтын медаль иегері атанды. Әйелдер арасындағы бокстан екі дүркін әлем чемпионы.
2024 жылғы Париж жазғы олимпиадасында тамыз айының 6 жұлдызында өткен ширек финалда қытайлық боксшы Ю. Вумен жекпе-жекке шығып, төрешілер шешімімен қола жүлдеге ие болды. Дегенмен, Назым алтыннан үмітті еді, жекпе-жектен кейінгі сұхбат барысында, “Жекпе-жек өзім ойлағандай болмады, алтын алғым келген еді” деп көз жасына ерік берді. Назым Қызайбайды әйелдер боксынан Қазақстандық спорттың бет-бейнесі деуге толық негіз бар.
Назым Қызайбай алтыннан үмітті болғанымен, қолаға да шүкіршілік етті. Бұл Қазақстанның әйелдер боксынан олимпиада ойындарында алған үшінші қоласы. 2012 жылы Лондон олимпиадасында Марина Вольнова, 2016 жылы Рио олимпиадасында Дариға Шәкімова қола медаль иеленген.
Ақерке БИЖАН
