Ұзағынан  сүйіндірсін

  Тыныштықтың тілеулесі Тәуелсіздіктің  тағы  бір  арайлы  таңы  атты. Көңіл  көкжиекте, жанымыз  жадыраған  жайдары  қалыпта. Бұл  күн- халқымыз  үшін  қуаныштың  қанаты  шалқар  көкке  шарықтаған, ұлағатты  ұғымның  ұлылығы   баға  жетпес  байлығымен  ұлықталатын  күн. Ата-бабамыз  ғасырлар  бойы  жері  мен  елін  найзаның  ұшы, білектің  күшімен  қорғап, қасықтай  қаны  мен  шыбындай  жанын  құрбандыққа  шалғанда  нені  мақсат  етті  дейсіз. Бәрі  осы  еркіндік  пен  тәуелсіздік, болашақ  ұрпақтың, басқаның  айтқанына  көніп, айдағанына жүруден  азат, еркін  өмір  сүрсе  деген  арман  еді  ғой. Сол  елі  мен  жерінің  оң  жағына  орман, жел  жағына  қорған  бола  білген  асыл  жандардың  арманы  орындалып, бүгін  міне, ұрпақтары  ақ  түйенің  қарны  жарылғандай  кемел  қуанышқа  кенелуде. Осыдан  33  жыл  бұрын  қазақтың  астанасында  әлемді  дүр  сілкіндірген, орталықтың  жүрегін  дір  еткізіп, саналарына  салмақ  түсірген  оқиға  өзінің  ұстанған  бағыт-бағдарының  дұрыстығын  айқындап  берді. Жылы  орнынан  айырылып  қалмау  үшін  жоғарыға  жағынып, солардың  қас-қабағын  баққан, солардың  айтқанымен  жүріп-тұрған  мансапқорлар  орталықтың  жастарға  «бұзақы»  деп  баға берген  бір  жақты  ұстанымына  шыбындап  бас  изегеніне  ішіміз  ашығаны  анық. Бірақ, әділдік  жеңіп, ақиқат  салтанат  құрмай  қоймайды  екен. Ақыр  түбінде  сол  «бұзақы» қанжоса  болып таяққа жығылған, бас  бостандығынан  айырылып, құғын-сүргін  көрген жастардың  көтерген  ұраны  дұрысқа  шықты. Олардың  ақ  ниеті  мен  асқақ  армандарын  бүкіл  әлем  мойындауда  бүгінгі  таңда. Бұл  үшін  жалынды  жастарға  қандай  алғыс  айтса  да  артықтық  етпейді. Солар  салып  берген  сара  жол  ендігі  жерде  алған  бағытынан  айнымасын. Тәуелсіздігіміз ұзағынан  сүйіндірсін!

                                                                                                                                                              Бекболат  БІРБАЕВ,                                                                                              

                                                                   аудандық  ақсақалдар  алқасының  төрағасы,

                                                                      Алматы  облыстық  мәслихатының  депутаты.

0 Пікір

Пікір қалдыру

Login

Welcome! Login in to your account

Remember me Lost your password?

Lost Password